- Nei, það er ekki hættulegt að gista hjá okkur. Við höfum nú upplifað 9 eldgos og rýmt hótelið 9 sinnum. Á þessum tíma hefur enginn gestur né starfsmaður verið í hættu. Við höfum alltaf 3 leiðir út af svæðinu og erum löngu farin áður en að hraun hefur farið yfir Grindavíkurveg.

- Ef yfirvöld myndu meta það hættulegt að gista á Northern Light Inn, þá væri okkur gert að loka.

- Svartsengi er grænmerkt á áhættumati Veðurstofu Íslands.

- Líkanreikningar sem m.a. byggja á mælingum á landrisi sýna að hraði kvikusöfnunar undir Svartsengi hefur aldrei verið hægari. Það að kvikusöfnun hafi aldrei verið hægari og magn kviku undir Svartsengi hafi aldrei verið meira á milli eldgosa, eykur óvissuna um framvinduna á svæðinu. Ekki er hægt að segja til um hvort eða hvenær kvikuhlaup eða eldgos verður og tímaramminn hleypur á mánuðum.

- Mikilvægt er að vera meðvituð um það að kvikuhlaup úr Svartsengi þarf ekki að enda í eldgosi. Líkt og áður hefur gerst hefur kvika farið frá Svartsengi án þes að til eldgoss komi. Við kvikuhlaup, rýmum við svæðið hvort sem til eldgoss kemur eða ekki þar sem við tökum aldrei neina áhættu þegar kemur að gestum okkar eða starfsfólki.

- Við erum núna komin í mestu kvikusöfnun enda erum við jafnframt í lengsta goshléi síðan að atburðurinn hófst þann 10 nóvember 2023. Mikilvægt er að átta sig á því að innflæði í kvikuhólfið hefur aldrei verið eins hægt og nú. Það þýðir að spennumyndun er hægari en áður.

- Hægari spennumyndun leiðir af sér að allar breytingar taka lengri tíma og ómögulegt að segja til um hvort það gjósi á nýjan leik eða hvenær slíkt getur gerst.

- Reynslan úr Kröflueldum sýnir að við getum verið með hægt innflæði af kviku í langan tíma en svo stoppar þetta. Í kjölfar síðasta eldgossins í Kröflueldum 1984 mældist áframhaldandi landris í 5 ár þar á eftir eða til ársins 1989 en þá lauk innflæði kviku loksins.

- Ef kvikuhlaup hefst, hvort sem að það endi í eldgosi eða ekki, fáum við boð um að rýma svæðið. Í slíkum tilfellum göngum við á hvert herbergi og látum gesti okkar vita. Allir fá nægan tíma til að pakka farangri og svo hittumst við í móttökunni. Þar er tryggt að allir fari í bíla og við förum saman út af svæðinu.

- Við höfum nægan tíma og alltaf 3 leiðir út af svæðinu. Þó svo að hraun hafi farið yfir Grindavíkurveg þá hefur það tekið að lágmarki 6 klukkustundir að ná veginum. Lengsta rýming hjá okkur hefur verið 40 mínútur.

- Við komum öllum okkar gestum fyrir á öðrum hótelum eða til síns heima. Starfsfólk NLI er svo strax mætt aftur á svæðið þar sem starfsfólk NLI er hluti af viðbragðsteymi Almannavarna en við sjáum um mat fyrir alla viðbragðsaðila. Við erum því alltaf á svæðinu.